Alok Yadav
baharon ke na.e mausam bulate rah ga.e
nazar men tu raha ham jaate jaate rah ga.e
divana ek dil ki baat kah kar chal diya
mohazzab log saare kasmasate rah ga.e
kisi ne haal puchha tha bas itni baat thi
miri ankhon men aansu aate aate rah ga.e
bahut charche the jis dar ki saḳhavat ke yahan
vo auron par khula ham sar jhukate rah ga.e
vo pahle muskura.e phir liya pahlu badal
hamin nadan the bas muskurate rah ga.e
Leave a Reply