khana-e-zanjir ka paband rahta huun sada
ghar abas ho puchhte mujh khanaman-barbad ka
ishq-e-qadd-e-yar men kya na-tavani ka hai zor
ghash mujhe aaya jo saaya pad gaya shamshad ka
khud-faramoshi tumhari ghair ke kaam aa gai
yaad rakhiyega zara bhule se kahna yaad ka
khat likha karte hain ab vo yak qalam mujh ko shikast
pech se dil todte hain ashiq-e-nashad ka
ishq-e-pechan ka chaman men jaal phaila dekh kar
bulbulon ko sarv par dhoka hua sayyad ka
qamat-e-janan se karta hai akad kar ham-sari
hausla dekhe to koi sarv-e-be-buniyad ka
be-zabani men ‘amanat’ ki vo hain gul-reziyan
natiqa ho band ai dil bulbul-e-nashad ka
Leave a Reply