Hidayatullah Khan Shamsi
mujhe teri juda.i ka ye sadma maar Dalega
zamane bhar men rusva.i ka charcha maar Dalega
tumhare naam se janan mira ye dil dhaḌakta hai
ab aao haath rakh do varna dhaḌka maar Dalega
koi ghamgin mil jaa.e to hansna bhuul jaata huun
kisi din ḳhair-ḳhvahi ka ye jazba maar Dalega
charaghon men lahu Daalo hai laḌni jang zulmat se
vagarna ab ujalon ko andhera maar Dalega
zamin ke surḳh manzar raat ko sone nahin dete
kisi din mujh ko ye ehsas mera maar Dalega
zamin par eḌiyan ragḌo ki ab chashma koi phuTe
bahut zalim hai dariya ham ko pyasa maar Dalega
samundar paar karna ishq ka asan nahin ‘shamsi’
bhanvar se bach bhi jaa.en to kinara maar Dalega
Leave a Reply