har ghaḌi mujh ko be-qarar na kar
zindagi meri sogvar na kar
jis ke sahil ka kuchh pata hi nahin
aisi kashti ko iḳhtiyar na kar
be-ḳhudi meri be-ḳhudi na rahe
itna ehsan gham-gusar na kar
is qadar mujh pe iltifat-o-karam
mere mohsin tu sharmsar na kar
paak kar le havas se dil pahle
kaun kahta hai tujh ko pyaar na kar
apne va.ade ka rakh bharam ai dost
kisht-e-ummid reg-zar na kar
ḳhair-ḳhvahi ke naam par hargiz
mere aibon ka ishtihar na kar
aadmi hai to aadmi hi rah
adamiyat ko daghdar na kar
jo ‘sahar’ dil se bhuul baiTha ho
tazkira us ka baar baar na kar
Leave a Reply