Poet
ham-safar yaad hain us ke jo safar ḳhatm hua
jaane kab kaun si sazish ho ye Dar ḳhatm hua
be-sabab sab ko hi sabqat ke junun ne maara
aise bikhre hain ki rishton ka asar ḳhatm hua
e.atibar uThte hi ye kaisa taghayyur aaya
dil ka viran makan rah gaya ghar ḳhatm hua
shaḳh hi shaḳh ki dushman thi samar kya deta
phulne-phalne se pahle hi shajar ḳhatm hua
janta tha ki mire giit bhi kho ja.enge
tera mujh se jo ta.alluq tha agar ḳhatm hua
ham to maa.il the ba-har-hal lahu dene par
ik tiri tarz-e-taghaful se jigar ḳhatm hua
us ko bas mujh ko Dubone hi ki zid thi shayad
main jo Duuba to mire saath bhanvar ḳhatm hua
Leave a Reply