Aa Gai Sar Par Qaza Lo Sara Saman Rah Gaya

aa gai sar par qaza lo saara saman rah gaya

ai falak kya kya hamare dil men arman rah gaya

baghban hai chaar din ki bagh-e-alam men bahar

phuul sab murjha gae khali bayaban rah gaya

itna ehsan aur kar lillah ai dast-e-junun

baaqi gardan men faqat tar-e-gareban rah gaya

yaad aai jab tumhare ruup raushan ki chamak

main sarasar surat-e-aina hairan rah gaya

le chale do phuul bhi is bagh-e-alam se na ham

vaqt-e-rahlat haif hai khali hi daman rah gaya

mar gae ham par na aae tum khabar ko ai sanam

hausla ab dil ka dil hi men miri jaan rah gaya

na-tavani ne dikhaya zor apna ai ‘rasa’

surat-e-naqsh-e-qadam main bas numayan rah gaya

Leave a Comment