but bhi is men rahte the dil yaar ka bhi kashana tha
ek taraf kaabe ke jalve ek taraf but-khana tha
dilbar hain ab dil ke malik ye bhi ek zamana hai
dil vaale kahlate the ham vo bhi ek zamana tha
phuul na the araish thi us mast-ada ki aamad par
haath men daali daali ke ek halka sa paimana tha
hosh na tha be-hoshi thi be-hoshi men phir hosh kahan
yaad rahi khamoshi thi jo bhuul gae afsana tha
dil men vasl ke arman bhi the aur malal-e-furqat bhi
abadi ki abadi virane ka virana tha
uf-re bad-e-josh-e-javani aankh na un ki uthti thi
mastana har ek ada thi har ishva mastana tha
shama ke jalve bhi ya-rab kya khvab tha jalne valon ka
sub.h jo dekha mahfil men parvana hi parvana tha
dekh ke vo tasvir miri kuchh khoe hue se kahte hain
haan haan yaad to aata hai is shakl ka ik divana tha
ghair ka shikva kyunkar rahta dil men jab ummiden thiin
apna phir bhi apna tha begana phir begana tha
‘bedam’ is andaz se kal yuun ham ne kahi apni biiti
har ek ne samjha mahfil men ye mera hi afsana tha