Alam Khursheed
jal bujha huun main magar saara jahan taak men hai
koi tasir to maujud miri ḳhaak men hai
khenchti rahti hai har lamha mujhe apni taraf
jaane kya chiiz hai jo parda-e-aflak men hai
koi surat bhi nahin milti kisi surat men
kuza-gar kaisa karishma tire is chaak men hai
kaise Thahrun ki kisi shahr se milta hi nahin
ek naqsha jo mire dida-e-namnak men hai
ye ilaqa bhi magar dil hi ke taabe Thahra
ham samajhte the amaan gosha-e-idrak men hai
qatl hote hain yahan nara-e-elan ke saath
vaz.a-dari to abhi alam-e-saffak men hai
kitni chizon ke bhala naam tujhe ginva.un
saari duniya hi to shamil miri imlak men hai
ra.egan koi bhi shai hoti nahin hai ‘alam’
ghaur se dekhiye kya kya ḳhas-o-ḳhashak men hai
Leave a Reply