mohabbat mustaqil kaif-afrin malum hoti hai
ḳhalish dil men jahan par thi vahin malum hoti hai
tire jalvon se Takra kar nahin malum hoti hai
nazar bhi ek mauj-e-tah-nashin malum hoti hai
nuqush-e-pa ke sadqe bandagi-e-ishq ke qurban
mujhe har samt apni hi jabin malum hoti hai
miri rag rag men yuun to dauḌti hai ishq ki bijli
kahin zahir nahin hoti kahin malum hoti hai
ye e.ajaz-e-nazar kab hai ye kab hai husn ki kavish
hasin jo chiiz hoti hai hasin malum hoti hai
umiden toḌ de mere dil-e-muztar ḳhuda-hafiz
zaban-e-husn par ab tak nahin malum hoti hai
use kyuun mai-kada kahta hai batla de mire saaqi
yahan ki sar-zamin ḳhuld-e-barin malum hoti hai
are ai chara-gar haan haan ḳhalish tu jis ko kahta hai
ye shai dil men nahin dil ke qarin malum hoti hai
kisi ke pa-e-nazuk par jhuki hai aur nahin uThti
mujhe ‘bahzad’ ye apni jabin malum hoti hai
Leave a Reply