is qadar bhi to na jazbat pe qaabu rakkho
thak ga.e ho to mire kandhe pe baazu rakkho
bhulne paa.e na is dasht ki vahshat dil se
shahr ke biich raho baagh men aahu rakkho
ḳhushk ho ja.egi rote hue sahra ki tarah
kuchh bacha kar bhi to is aankh men aansu rakkho
raushni hogi to aa ja.ega rah-rav dil ka
us ki yadon ke diye taaq men har-su rakkho
yaad aa.egi tumhari hi safar men us ko
us ke rumal men ik achchhi si ḳhushbu rakkho
ab vo mahbub nahin apna magar dost to hai
us se ye ek ta.alluq hi bahar-su rakkho
Leave a Reply