koi jhankar hai naghma hai sada hai kya hai
tu kiran hai ke kali hai ke saba hai kya hai
teri ankhon men ka.i rang jhalakte dekhe
sadgi hai ki jhijhak hai ki haya hai kya hai
ruuh ki pyaas bujha di hai tiri qurbat ne
tu koi jhiil hai jharna hai ghaTa hai kya hai
naam honTon pe tira aa.e to rahat si mile
tu tasalli hai dilasa hai dua hai kya hai
hosh men la ke mire hosh uḌane vaale
ye tira naaz hai shoḳhi hai ada hai kya hai
dil ḳhatavar-e-nazar parsa tasvir-e-ana
vo bashar hai ki farishta hai ki ḳhuda hai kya hai
ban ga.i naqsh jo surḳhi tire afsane ki
vo shafaq hai ki dhanak hai ki hina hai kya hai
Leave a Reply