bujh ga.i dil ki raushni raah dhuan dhuan hui
subah chale kahan se the shaam hamen kahan hui
shauq ki rah-e-pur-ḳhatar tai to kar aa.e ham magar
nazr-e-havadis-e-safar daulat-e-jism-o-jan hui
ishq-o-junun ke vardat dida-o-dil ke sanehat
biiti hui har ek baat duur ki dastan hui
koi bhi ab nahin raha jis ko sharik-e-gham kahen
daur-e-tarab ki yaad bhi shamil-e-raftagan hui
luT ga.i kaise daf.atan raushniyon ki anjuman
aa ke kahan se ḳhema-zan zulmat-e-be-karan hui
kis ko ḳhabar ki ham ne kya ḳhvab bane hain umr-bhar
kis se kahen ki zindagi kis liye ra.egan hui
tarz-e-bayan to be-qayas the tire gham-zadon ke paas
bol uThi nigah-e-yas band agar zaban hui
Leave a Reply