gham se kahin najat mile chain paaen ham
dil khuun men nahae to ganga nahaen ham
jannat men jaaen ham ki jahannam men jaaen ham
mil jaae to kahin na kahin tujh ko paaen ham
jauf-e-falak men khaak bhi lazzat nahin rahi
ji chahta hai teri jafaen uthaen ham
dar hai na bhuul jaae vo saffak roz-e-hashr
duniya men likhte jaate hain apni khataen ham
mumkin hai ye ki vaade par apne vo aa bhi jaae
mushkil ye hai ki aap men us vaqt aaen ham
naraz ho khuda to karen bandagi se khush
mashuq ruuth jaae to kyunkar manaen ham
sar doston ka kaat ke rakhte hain samne
ghairon se puchhte hain qasam kis ki khaen ham
kitna tira mizaj khushamad-pasand hai
kab tak karen khuda ke liye iltijaen ham
lalach abas hai dil ka tumhen vaqt-e-vapsin
ye maal vo nahin ki jise chhod jaaen ham
saunpa tumhen khuda ko chale ham to na-murad
kuchh padh ke bakhshna jo kabhi yaad aaen ham
soz-e-darun se apne sharar ban gae hain ashk
kyuun ah-e-sard ko na patinge lagaen ham
ye jaan tum na loge agar aap jaegi
us bevafa ki khair kahan tak manaen ham
ham-sae jagte rahe nalon se raat bhar
soe hue nasib ko kyunkar jagaen ham
jalva dikha raha hai vo aina-e-jamal
aati hai ham ko sharm ki kya munh dikhaen ham
maano kaha jafa na karo tum vafa ke baad
aisa na ho ki pher len ulti duaen ham
dushman se milte julte hain khatir se dosti
kya faeda jo dost ko dushman banaen ham
tu bhulne ki chiiz nahin khuub yaad rakh
ai ‘dagh’ kis tarah tujhe dil se bhulaen ham
Leave a Reply