ashiq ka jahan men ghar na dekha
aisa koi dar-ba-dar na dekha
jaisa ki uḌe hai ta.ir-e-dil
aisa koi tez-par na dekha
ḳhuban-e-jahan hon jis se tasḳhir
aisa koi ham hunar na dekha
TuuTe dil ko bana dikhave
aisa koi kari-gar na dekha
us tegh-e-nigah se ho muqabil
aisa koi be-jigar na dekha
jaari hain hamesha chashma-e-chashm
aisa koi abr-e-tar na dekha
jo aab hai aabru men ‘hatim’
aisa koi ham guhar na dekha
Leave a Reply