Muqabil Us Dur-E-Dandan Ke Ye Guhar Kya Hai

Poet

muqabil us dur-e-dandan ke ye guhar kya hai

aur ‘aish’ laal ki us lab ke aage dar kya hai

ḳhayal-e-yar men ho mahv-e-be-ḳhudi aisa

mujhe ḳhabar nahin dil kya hai aur jigar kya hai

kahe hai ishq men naseh ki hai zarar dil ka

jo vaqa.i hai zarar ye hai to zarar kya hai

kiya hai nuuh ke tufan ko tu ne sharminda

irada ab tira kah aur chashm-e-tar kya hai

mila hai jis ko hasham qat-e-ma-siva allah

nazar men us ki ye duniya ka karr-o-far kya hai

tu meri aah se sina-sipar na ho ai charḳh

tujhe ḳhabar nahin is aah men asar kya hai

tu rah-e-ishq ke sadmon se mat Dara vaa.iz

jo sarfarosh hain is rah men un ko Dar kya hai

hamara chak-e-jigar baḳhiya-gar siyega che ḳhush

ye chaak vo nahin maqdur-e-baḳhiya-gar kya hai

ḳhayal jis ko ruḳh-o-zulf-e-yar ka hai bandha

vo janta hi nahin shaam aur sahar kya hai

hai dil ko naaz tire jis jahan-e-fani par

bata vo aur ba-juz ḳhana-e-do-dar kya hai

tu kis ghamanD pe misl-e-sharar uchhalta hai

ḳhayal dil men to kar hasti-e-sharar kya hai

ḳhuda ne khola hai ye raaz jin pe aalam men

vo jante hain ki mahiyyat-e-ashar kya hai

buton ko sajda-e-dar ke siva bata ai ‘aish’

jahan men ham ne kiya aur umr bhar kya hai