Munawwar Rana
mujh ko gahrai men mitti ki utar jaana hai
zindagi bandh le saman-e-safar jaana hai
ghar ki dahliz pe raushan hain vo bujhti ankhen
mujh ko mat rok mujhe laut ke ghar jaana hai
main vo mele men bhatakta hua ik bachcha huun
jis ke maan baap ko rote hue mar jaana hai
zindagi taash ke patton ki tarah hai meri
aur patton ko bahar-hal bikhar jaana hai
ek be-nam se rishte ki tamanna le kar
is kabutar ko kisi chhat pe utar jaana hai
Leave a Reply