Jis Ko Na Dil Pe Naz Ho Naz Tere uThae Kyun

Makhmoor Jalandhari

jis ko na dil pe naaz ho naaz tire uTha.e kyuun

uTh na sake jo astan le ke vo sar jhuka.e kyuun

main jo tira hijab huun kis liye be-naqab huun

parda ho jis ka chaak chaak parde men munh chhupa.e kyuun

vo jo na dil men bhar sake nur-o-ziya ki bijliyan

phuul men muskura.e kyuun zarre men jagmaga.e kyuun

husn-e-tabah-kar hai chahe kisi bhi shai men ho

ho na fareb agar hasin koi fareb khaa.e kyuun

chhaya hua hai jab tamam alam-e-ka.enat par

gosha-e-tang-o-tar men dil ke vo phir sama.e kyuun

hashr na.e uTha.e kyuun husn ko gar qarar ho

husn jo be-sukun na ho fitne na.e jaga.e kyuun

ab to ayaan hue baghair jaane na paoge kabhi

chhup ke miri nazar se tum ḳhalvat-e-dil men aa.e kyuun

shauq ho jis ka be-karan dil se bhi ho jo bad-guman

apni nigah ko bhi vo jalva tira dikha.e kyuun

pir-e-mughan shaji.a ho zarf bhi jab vasi.a ho

bada-kash-e-nigah-e-mast nashshe men laḌkhaḌa.e kyuun