apne maazi ko charaghon men basar ham ne kiya
kaT ga.i raat to didar-e-sahar ham ne kiya
sirf jangen hi nahin jiiti hain hain is duniya men
ma.arka ishq ke maidan ka bhi sar ham ne kiya
dekhne valon ki hairat ka Thikana na raha
ek patthar ko jo chamka ke guhar ham ne kiya
chand men aks nazar aaya hai tera jab se
husn vaale tujhe manzur-e-nazar ham ne kiya
kaun sach bolta hai zalim-o-jabir ke ḳhilaf
kaam duniya men ye be-ḳhauf-o-ḳhatar ham ne kiya
bhuul paana use asan to nahin tha yaaro
kaam ye thoḌa sa mushkil tha magar ham ne kiya
tab kahin ja ke ghazal rang hai laa.i ‘rahbar’
sirf ash.ar men jab ḳhun-e-jigar ham ne kiya
Leave a Reply