khuda ke vaste chehre se tuk naqab utha
ye darmiyan se ab parda-e-hijab utha
ye kaun bada-parasti hai ai but-e-bad-mast
utha jo bazm se teri so ho kabab utha
mutalee se tire bait-abruon ke shokh
rakkhi hai shaikh ne ab taaq par kitab utha
basan-e-naqsh-e-qadam jis ne pa-turab kiya
vo rah-e-ishq men mit kar gharaz shitab utha
ba-chashm-e-tar hi koi dam tu baith varna abas
tu ek dam ke liye bahr se hubab utha
piya hai shisha-e-gardun se jis ne ik jura
misal-e-jam vo ba-dida-e-pur-ab utha
‘nasir’ shor na kar fitna hovega barpa
khuda-na-khvasta ab gar vo mast-e-khvab utha