teri yaden bahal rakhti hai
raat dil par vabal rakhti hai
shab-e-gham ki ye ragni ban men
bansuri jaisi taal rakhti hai
dil ki vaadi se uthne vaali kiran
vahshaton ko ujaal rakhti hai
bam-o-dar par utarne vaali dhuup
sabz rang-e-malal rakhti hai
shaam khulti hai tere aane se
lab pe tera saval rakhti hai
ek ladki udaas safhon men
ik jazira sambhal rakhti hai
akhiri diip ki larazti lau
mahr o mah sa jamal rakhti hai
Leave a Reply