jab siine se marne ka Dar niklega
aur hi kuchh ye ḳhaak ka paikar niklega
bo jo raha huun amn-o-aman ki faslen main
dekhna kal is ḳhaak se lashkar niklega
sail banega hone ka idrak kabhi
is manzar se aur hi manzar niklega
duniya jiite ji jo duniya ho na saki
siine se ye arman mar kar niklega
gul-chinon ke zulm ki koi had hi nahin
kis din har ik shaḳh se ḳhanjar niklega
jidd-o-jahd ki jis se baten hoti hain
kya hoga jab ik din muḳhbar niklega
‘bedi’ mera qadam hi hoga duniya men
jo hadd-e-imkan se bahar niklega
Leave a Reply