kisi goshe men duniya ke makin hote hue bhi
vo mere saath rahta hai nahin hote hue bhi
musalsal azma.ish men mujhe zalim ne rakkha
kiya main ne nahin sajda jabin hote hue bhi
musalsal marte rahte hain shab-ḳhun zehn-o-dil par
azizan raftagan zer-e-zamin hote hue bhi
guzari ham ne saari zindagi ishq-e-butan men
mukammal us ki vahdat par yaqin hote hue bhi
liye phirta hai qatil haath men ḳhanjar barahna
muhayya pairahan men astin hote hue bhi
main zarra ḳhaak ka huun vo sitara asman ka
vo mujh se duur hai mere qarin hote hue bhi
na-jane kaun si miTTi ka ‘abid’ bhi bana hai
hamesha ḳhush nazar aaya hazin hote hue bhi
Leave a Reply