Manzoor Husain Shor
mujhe ai ham-nafas andesha-e-barq-o-ḳhizan kyuun ho
miri parvaz mahdud-e-faza-e-gulsitan kyuun ho
junun ki vus.aton par tang hai arsa do-alam ka
jo sajda ho to phir sajda ba-qaid-e-astan kyuun ho
mire kaam aa ga.i aḳhir miri kashana-bar-doshi
sharar-o-barq ki zad par bhi mera ashiyan kyuun ho
gham-e-dil bhi jo rusva-e-mazaq-e-am ho jaa.e
to phir in dastanon men hamari dastan kyuun ho
pyalon ki khanak se bhi jahan dil TuuT jaate hain
vahan chhaya hua har bazm par ḳhvab-e-giran kyuun ho
na main jan-dada-e-saqi na main varafta-e-mutrib
agar mahfil se uTh ja.un to mahfil bad-guman kyuun ho
main jis aalam men huun apni jagah ai ‘shor’ tanha huun
juda ho jis ki manzil vo rahin-e-karvan kyuun ho
Leave a Reply