tire khayal, tire khvab, tere naam ke saath
bani hai khaak miri kitne ehtimam ke saath
bahut se phuul the aur saare achchhe rangon ke
saba ne bheje the jo kal tire payam ke saath
nazar thaharti na thi us pe aur khud par bhi
main aine men thi kal ek lala-fam ke saath
tire khayal se raushan hai sar-zamin-e-sukhan
ki jaise zinat-e-shab ho mah-e-tamam ke saath
phir aa gai hai mire dar pe kya vahi duniya?
main kar ke aai thi rukhsat jise salam ke saath
suna hai phuul jhade the jahan tire lab se
vahan bahar utarti hai roz shaam ke saath
khushi ke vaste kab koi din muqarrar tha
magar ye dil men ruki hai tire khiram ke saath
Leave a Reply