Ahmad Javed
saba dekh ik din idhar aan kar ke
ye dil bhi pada hai gulistan kar ke
yahi dil jo ik buund hai bahr-e-gham ki
dubo dega sab shahr tufan kar ke
miyan dil ko is aina-ru ke aage
jo rakhna to yak-lakht hairan kar ke
khuda jaane kya asliyat ghair ki hai
dikhe hai bani-nau-e-insan kar ke
use ab raqibon men paate hain aksar
rakha jis ko khud se bhi anjan kar ke
dikha denge achchha isi fasl-e-gul men
gareban ko ham gareban kar ke
hamare to ik ghar bhi hai bhaai majnun
pade hain usi ko bayaban kar ke
Leave a Reply