Imam Bakhsh Nasikh
aa gaya jab se nazar vo shokh harjai mujhe
ku-ba-ku dar dar liye phirti hai rusvai mujhe
kaam ashiq ko kisi ki aib-bini se nahin
husn-bini ko khuda ne di hai binai mujhe
jaur sahta huun buton ke na-tavani ke sabab
dil utha luun is qadar kab hai tavanai mujhe
jis tarah aata hai piiri men javani ka khayal
vasl ki shab yaad roz-e-hijr men aai mujhe
ginti ek ik naam ki har gor men murde hain dafn
bad-e-murdan bhi hui dushvar tanhai mujhe
misl-e-saghar bazm-e-alam men main kab khandan hua
kis liye deta hai gardish charkh-e-minai mujhe
ain danai hai ‘nasikh’ ishq men divangi
aap saudai hain jo kahte hain saudai mujhe
Leave a Reply