dil jis se kanpta hai vo saa.at bhi aa.egi
vo aa.ega to koi musibat bhi aa.egi
main aaj teri raah ka patthar sahi magar
kal tujh ko pesh meri zarurat bhi aa.egi
jhele hain apni jaan pe ham ne vo hadse
dil manta nahin ki qayamat bhi aa.egi
us ki kashidgi ka sabab kuchh bhi ho magar
mujh ko guman na tha ki ye naubat bhi aa.egi
ai rah-navard saya-e-ashjar hi nahin
kuchh tere kaam dhuup ki hiddat bhi aa.egi
kya fa.eda jo apni safa.i men kuchh kahun
main janta tha mujh pe ye tohmat bhi aa.egi
Leave a Reply