Hawas-O-Hosh Se Begana Hona Bhi Zaruri Hai

havās-o-hosh se begāna honā bhī zarūrī hai

kabhī insān kā dīvāna honā bhī zarūrī hai

ye āñkheñ kis liye phir aur dī haiñ dene vaale ne

charāġh-e-husn kā parvāna honā bhī zarūrī hai

kuchh is unvān se phaile ki maqbūl-e-do-ālam ho

haqīqat ke liye afsāna honā bhī zarūrī hai

nahīñ be-kaif-e-sahbā Thiik duniyā se guzar jaanā

halāk-e-gardish-e-paimāna honā bhī zarūrī hai

baġhair us ke junūñ kī azmatoñ par tabsira kaisā

‘munavār’ ke liye farzāna honā bhī zarūrī hai

Leave a Comment