Irfan Sattar
ab aa bhi jaao, bahut din hue mile hue bhi
bhula hi denge agar dil men kuchh gile hue bhi
hamari raah alag hai, hamare ḳhvab juda
ham un ke saath na honge, jo qafile hue bhi
hujum-e-shahr-e-ḳhirad men bhi ham se ahl-e-junun
alag dikhenge, gareban jo hon sile hue bhi
hamen na yaad dilao hamare ḳhvab-e-suḳhan
ki ek umr hue honT tak hile hue bhi
nazar kii, aur manazir ki baat apni jagah
hamare dil ke kahan ab, jo silsile hue bhi
yahan hai chak-e-qafas se udhar ik aur qafas
so ham ko kyaa, jo chaman men hon gul khule hue bhi
hamen to apne usulon ki jang jitni hai
kise gharaz, jo koi fat.h ke sile hue bhi
Leave a Reply