khuda ali-gadh ki madrase ko tamam amraz se shifa de
bhare hue hain rais-zade amir-zade sharif-zade
latif o khush-vaza chust-o-chalak o saf-o-pakiza shad-o-khurram
tabiaton men hai un ki jaudat dilon men un ke hain nek irade
kamal mehnat se padh rahe hain kamal ghairat se badh rahe hain
savar mashriq ki raah men hain to maghribi raah men piyade
har ik hai un men ka be-shak aisa ki aap use jante hain jaisa
dikhae mahfil men qadd-e-raana jo aap aaen to sar jhuka de
faqir mangen to saaf kah den ki tu hai mazbut ja kama kha
qubul farmaen aap davat to apna sarmaya kul khila de
buton se un ko nahin lagavat mison ki lete nahin vo aahat
tamam quvvat hai sarf-e-khvandan nazar ke bhole hain dil ki saade
nazar bhi aae jo zulf-e-pechan to samjhen ye koi policy hai
electric light us ko samjhen jo barq-vash koi koi de
nikalte hain kar ke ghol-bandi ba-nam-e-tahzib o dard-mandi
ye kah ke lete hain sab se chande hamen jo tum do tumhen khuda de
unhen isi baat par yaqin hai ki bas yahi asal kar-e-aden hai
isi si hoga farogh-e-qaumi isi se chamkenge baap daade
makan-e-college ke sab makin hain abhi unhen tajrabe nahin hain
khabar nahin hai ki aage chal kar hai kaisi manzil hain kaisi jaade
dilon men un ke hai nur-e-iman qavi nahin hai magar nigahban
hava-e-mantiq ada-e-tifli ye shama aisa na ho bujha de
fareb de kar nikale matlab sikhae tahqir-e-din-o-mazhab
mita de akhir ko vaz-e-millat numud-e-zati ko gar badha de
yahi bas ‘akbar’ ki iltija hai janab-e-bari men ye dua hai
ulum-o-hikmat ka dars un ko professor den samajh khuda de
Leave a Reply