Arif Imam
sha.eri mujh ko ajab haal men le jaati hai
kabhi matam kabhi dhammal men le jaati hai
men kisi chashm-e-nigah-dar ki had men huun ki jo
mujh ko vapas mire ahval men le jaati hai
meri ḳhvahish baḌi tafsil-talab hai lekin
teri surat mujhe ijmal men le jaati hai
main bichhata huun musalla sar-e-mehrab-e-niyaz
phir ibadat mujhe patal men le jaati hai
main to sunta hi nahin huun koi guftar-e-ḳhirad
ye kabhi qiil kabhi qaal men le jaati hai
raas aa.i na mujhe a.ina-ḳhane ki chamak
ye miri shakl ko ashkal men le jaati hai
ḳhud-faramoshi ki ik lahr kahin se aa kar
ek do baar mujhe saal men le jaati hai
is liye sota nahin main ki nigar-e-duniya
ḳhema-e-ḳhvab se pinDal men le jaati hai
Leave a Reply