mehr o mahtab ko mere hi nishan janti hai
main kahan huun vo mari sarv-e-ravan janti hai
tum se ho kar hi to aa.i hai lahu tak mere
tum ko ye surḳhi-e-jan shola-ruḳhan janti hai
kaun apna hai samajhti hai ḳhamoshi shab ki
ajnabi kaun hai avaz-e-sagan janti hai
dil ko ma.alum hai kya baat batani hai use
us se kya baat chhupani hai zaban janti hai
ḳhaak ko chhoḌ ke jaana hamen manzur nahin
ham ḳhas-o-ḳhar nahin ju-e-tapan janti hai
tu kabhi ḳhvahish-e-duniya nahin karne vaala
mere abdal tujhe danish-e-jan janti hai
mere paas aa ke bhi rahti hai gurezan mujh se
main na Dubunga miri mauj-e-guman janti hai
is tarah ghurti rahti hai shab-o-roz mujhe
jaise duniya mire sab raz-e-nihan janti hai
Leave a Reply