aftab-shakeel

Ajab Mamul Hai Aawargi Ka

ajab maamul hai avargi ka

gareban jhankti hai har gali ka

na jaane kis tarah kaise khuda ne

bharosa kar liya tha aadmi ka

abhi is vaqt hai jo kuchh hai varna

koi lamha nahin maujudgi ka

mujhe tum se bichhadne ke evaz men

vasila mil gaya hai shairi ka

zamin hai raqs men suraj ki janib

chhupa kar jism aadha tirgi ka

main ik hi sat.h par thahrunga kaise

utarta chadhta paani huun nadi ka

main mitti gundh kar ye sochta huun

mujhe fan aa gaya kuza-gari ka

khatak jaunga sofe ko tumhare

main banda baithne vaala dari ka

main us manzar men paaya hi gaya kab

jahan bhi zaviya nikla khushi ka

samundar jis ki ankhon ka ho khali

vo kaise khvab dekhe jal-pari ka

nikalo kiil ko divar men se

vagarna taang lo photo kisi ka

More Poems

Leave a Comment