tanha.iyon ka habs mujhe kaTta raha
mujh tak pahunch saki na tire shahr ki hava
vo qahqahon ki sej pe baiTha hua mila
main jis ke dar pe dard ki barat le gaya
ik umr justuju men guzari to ye khula
vo mere paas tha main jise DhunDhta raha
nikla huun lafz lafz se main Duub Duub kar
ye tera ḳhat hai ya koi dariya chaḌha hua
nazren milen to vaqt ki raftar tham ga.i
nazuk se ek lamhe pe sadiyon ka bojh tha
main ne baḌha ke haath use chhu liya ‘rashid’
itna qarib aaj mire chand aa gaya
Leave a Reply