be-yaqini ke Dar se TuuT ga.e
ham jo dast-e-hunar se TuuT ga.e
tum nahin jante ki kitne dil
hadse ke asar se TuuT ga.e
hausle dhuup ne kiye paspa
jism lambe safar se TuuT ga.e
phir hamen kirchiyan dikhane laga
ḳhvab jab ḳhvab-gar se TuuT ga.e
ek taa.ir ki vapsi na hui
sabz mausam shajar se TuuT ga.e
kabhi ham chaak tak nahin pahunche
aur kabhi kuza-gar se TuuT ga.e
kya tilismi nigah thi kisi ki
log pahli nazar se TuuT ga.e
silsile sachchi chahaton ke ‘safir’
ek jhuTi ḳhabar se TuuT ga.e
Leave a Reply