Poet
rah-e-talab men ahl-e-dil jab had-e-am se baḌhe
kashmakash-e-hayat ke aur bhi hausle baḌhe
kis se ye puchhiye bhala tishna-labon ko kya mila
kahne ko yuun to roz hi saikḌon mai-kade baḌhe
koshish-e-paiham afrin manzil ab aa ga.i qarib
muzhda ho arzu-e-dil paanv ke aable baḌhe
aate hi us ne bazm men ruḳh pe naqab Daal li
haa.e vo manzar-e-hasin jaise diye jale baḌhe
vaqt ki azma.ishen laati hain ziist par nikhar
phulon ko dekh lijiye kanTon men jo pale-baḌhe
tabish-e-husn-e-yar ne chhin li tab-e-arz-e-shauq
jitne qarib aa.e vo utne hi fasle baḌhe
rahon ke ruḳh badal ga.e manzilen duur ho ga.iin
ḳhizr ke e.atibar par jab kabhi qafile baḌhe
Leave a Reply