Azhar Naiyyar
main apne shahr men apna hi chehra kho baiTha
ye vaqi.a jo sunaya to vo bhi ro baiTha
tumhari aas men ankhon ko main bhigo baiTha
ki dil men yaas ke kanTe ka.i chubho baiTha
mata-e-hal na maazi ka koi sarmaya
nadi men vaqt ki har chiiz ko Dubo baiTha
sunahre vaqt ki tahriren jin men thiin mahfuz
main un sahifon ko ashkon se apne dho baiTha
main sunta rahta tha jis aa.ine ki sargoshi
vo shahr-e-sang men apni jila bhi kho baiTha
kisi babul ke saa.e tale mili jo amaan
to apne paanv men kanTe bhi main chubho baiTha
vahi raha hai bahar-taur shadman ‘nayyar’
jo apne gham men gham-e-digaran samo baiTha
Leave a Reply