Azra Naqvi
bahut dinon se hamara khvabon se koi bhi rabta nahin hai
kuchh aise kar-e-jahan men khoe ki apna bhi kuchh pata nahin hai
ye na-umidi ki intiha hai ki agahi ki hai koi manzil
ye dil ko kya ariza hua hai ise kisi se gila nahin hai
hamesha sach bolne ki aadat hai kya ye sach bolte rahenge
qadam qadam par hai azmaish sahal koi marhala nahin hai
ham un ki har baat maan lete to zindagi chain se guzarti
bas izzat-e-nafs rokti hai ana ka ye masala nahin hai
bas ik pareshan hujum ke saath ham bhi shamil hain chal rahe hain
na koi naqsh-e-qadam salamat kahin koi rasta nahin hai
ye shaam itni ujaad kyuun hai naya koi hadisa hua hai
ye khuun ki surkhi shafaq ke rangon men ghul gai be-vajah nahin hai
sitara-e-subh dhundte hain ghubar-aluda mausamon men
nazar se ojhal to ho gaya hai magar abhi gum-shuda nahin hai
jo mil gaya vo nasib samjha jo mil na paaya sarab jaana
guzar len jo bhi zindagi hai ki kal ka koi pata nahin hai
yunhi bhatakte phirenge kab tak khud apne andar talash kar len
jahan mukammal sukun mayassar ho aisi koi jagah nahin hai
Leave a Reply