ye nahin ki vo karam parvari karta hi nahin
dil vo TuuTa hua bartan hai ki bharta hi nahin
ek uljhan hai ki baḌhti hi chali jaati hai
ik tamasha hai ki ankhon se utarta hi nahin
ik tire hijr ki mi.ad ki kaaTe na kaTe
ik tire vasl ka lamha ki Thaharta hi nahin
dosto laao koi kashti-e-nuh-e-ummid
ab ke paani vo chaḌha hai ki utarta hi nahin
ashk-e-ḳhun-e-dil-e-vahshi dabe paanv vaala
ik musafir hai ki palkon se guzarta hi nahin
umr-bhar dete rahe hain tujhe tavan-e-vafa
sud-dar-sud tira qarz utarta hi nahin
Leave a Reply