akbar-hyderabadi

Jin Pe Ajal Tari Thi Un Ko Zinda Karta Hai

jin pe ajal taari thi un ko zinda karta hai

suraj jal kar kitne dilon ko Thanda karta hai

kitne shahr ujaḌ jaate hain kitne jal jaate hain

aur chup-chap zamana sab kuchh dekha karta hai

majburon ki baat alag hai un par kya ilzam

jis ko nahin koi majburi vo kya karta hai

himmat vaale pal men badal dete hain duniya ko

sochne vaala dil to baiTha socha karta hai

jis basti men nafsa-nafsi ka qanun chale

us basti men kaun kisi ki parva karta hai

pyaar bhari avaz ki lai men maddham lahje men

tanhai men koi mujh se bola karta hai

us ik sham-e-farozan ke hain aur bhi parvane

chand akela kab suraj ka halqa karta hai

ruuh barahna nafs barahna zaat barhana jis ki

jism pe vo kya kya poshaken pahna karta hai

ashkon ke sailab-e-ravan ko ‘akbar’ mat roko

bah jaae to buujh ye dil ka halka karta hai

More Poems

Leave a Comment