Farhat Abbas Shah
tu ne dekha hai kabhi ek nazar shaam ke ba.ad
kitne chup-chap se lagte hain shajar shaam ke ba.ad
itne chup-chap ki raste bhi rahenge la-ilm
chhoḌ ja.enge kisi roz nagar shaam ke ba.ad
main ne aise hi gunah teri juda.i men kiye
jaise tufan men koi chhoḌ de ghar shaam ke ba.ad
shaam se pahle vo mast apni uḌanon men raha
jis ke hathon men the TuuTe hue par shaam ke ba.ad
raat biiti to gine aable aur phir socha
kaun tha ba.is-e-aghaz-e-safar shaam ke ba.ad
tu hai suraj tujhe ma.alum kahan raat ka dukh
tu kisi roz mire ghar men utar shaam ke ba.ad
lauT aa.e na kisi roz vo avara-mizaj
khol rakhte hain isi aas pe dar shaam ke ba.ad
Leave a Reply