hina.i jalti poren sabr ka phal dil ka darvaza
sikuḌti dastaken hairat muqaffal dil ka darvaza
kahin par habs ka mehvar kahin ujlat havaon ki
kahin par bijli pahne oḌhe badal dil ka darvaza
mahakti aas ki divar se kaa.i ukhaḌti hai
bane jab sar ki chunari aur anchal dil ka darvaza
tanab-e-ḳhema-e-ehsas ki vahshat sameTega
agar khul jaa.e sahra par mukammal dil ka darvaza
tamanna-e-sada matlub aghushta ba-ḳhun-manzar
ḳhamosh-o-ḳhasta ik muddat se pagal dil ka darvaza
bhaTakti aankh gham hairat aziyyat reshmi parde
ulajhti niind aiThan ḳhvab maḳhmal dil ka darvaza
paraya hijr ḳhamiyaze ki uljhan malgaje ‘irshad’
sisakta vasl kalak aankh ojhal dil ka darvaza
Leave a Reply