apne muhafizon se hirasan hai zindagi
is zindagi ke haal pe hairan hai zindagi
yuun runuma hue mire halat men tazad
gulshan kabhi thi aaj bayaban hai zindagi
us shaḳhs ka bhi aaj muqaddar sanvar gaya
likha tha jis ke dar pe pareshan hai zindagi
ghar baiThne se mil na sakega koi suragh
azm-o-amal ki raah men pinhan hai zindagi
kyon zindagi ki mujh ko dua de rahe hain aap
mere liye to maut ka saman hai zindagi
do-char din men gham se milegi hamen najat
do-char din ki aur ye mehman hai zindagi
‘ejaz’ koi puchhne vaala nahin yahan
urdu ki tarah be-sar-o-saman hai zindagi
Leave a Reply