kya kya badal ga.e hain andaz aadmi ke
paisa hi ab ḳhuda hai parde men bandagi ke
office men laTe aana pahchan afsaron ki
aur qisse chheḌte hain daftar men dil-lagi ke
rishvat ko haq samajh kar bharte hain jeb apni
har tarah kar rahe hain saman behtari ke
hain be-zamir phir bhi da.ava hai leaderi ka
ab vote mangte hain talib hain membari ke
bas naam rah gaya hai insaf ab kahan hai
haq apna kis se mangen mazlum is sadi ke
afsane nekiyon ke be-jan ho rahe hain
mansube ban rahe hain ab chaar su badi ke
kya inqalab aaya badli hava kuchh aisi
beTe bane minister imran mistiri ke
vaa.iz bhi aj-kal ke mai-ḳhvar ho ga.e hain
dete hain va.az ham ko aksar sharab pi ke
qismat se vo hamare hukkam ban ga.e hain
hote the roz charche jin ki sitamgari ke
banti thi pahle sabzi ghi ka baghar de kar
sabzi se ban rahe hain ab Dabbe roz ghi ke
vo kaun hai jo baḌh kar avaz-e-haq uTha.e
sab surma bane hain unvan-e-buzdili ke
Leave a Reply