Ejazulhaq Shahab
ḳhauf sa phir labon pe taari hai
ik ajab kaifiyat hamari hai
aao badlen nizam-e-gulshan ham
kuchh hamari bhi zimmedari hai
raushni haq ke ek jugnu ki
sainkaḌon zulmaton pe bhari hai
aap ka to koi javab nahin
aa.iye ab hamari baari hai
jashn-e-tadfin-e-arzu-e-visal
aur sanson ka raqs jaari hai
vasl ka ek qimti lamha
hijr ki muddaton pe bhari hai
vahshat-e-ishq men suno ham ne
din sameTa hai shab utari hai
qahqahon ka nagar tumhen saunpa
dard par saltanat hamari hai
ghalatiyan aap se nahin hotin
kya farishton se rishta-dari hai
aap suniye ‘shahab’ ko bhi kabhi
goya ilham-e-rabt jaari hai
Leave a Reply