Khuli Jab Aankh To dekha Ki Tha Bazar Ka Halqa

Abdul Mannan Tarzi

khuli jab aankh to dekha ki tha bazar ka halqa

khuda maalum kab tuuta mire pindar ka halqa

tulu-e-sham bhi mujh ko naved-e-sub.h-e-farda hai

kahin chamke hilal-e-abru-e-kham-dar ka halqa

mira khun-e-tamanna hai hina-band-e-kaf-e-qatil

junun-e-shauq kaam aaya faraz-e-dar ka halqa

dil but ashna kuchh is tarah su-e-haram aaya

barahman jaise nikle tod kar zunnar ka halqa

talab ki raah men pa-e-ana se barha uljha

kabhi inkar ka halqa kabhi iqrar ka halqa

ye ku-e-gham badal jaae na ab dasht-e-tamanna se

junun-angez hai zindan ki har divar ka halqa

har ik mahfil men jaana har kisi se baat kar lena

gavara kar nahin sakta mire meaar ka halqa

lahu qadmon se yuun phuta ki zanjiren lahak utthin

munavvar ho gaya zindan-e-tang-o-tar ka halqa

gham-e-imroz ne paiman kiya hai ishq-e-farda se

kabhi to hoga shana-gir zulf-e-yar ka halqa

koi asan na tha lekin bahut mushkil na tha ‘tarzi’

miri zarb-e-nafas se khul gaya asrar ka halqa