Sadiya Safdar Saadi
aankh meri ulaT ga.i hogi
ḳhvab ki umr ghaT ga.i hogi
maang se ḳhuun bah raha hoga
ḳhaak se zulf aT ga.i hogi
ruuh apne safar pe nikli jab
tan se miTTi chimaT ga.i hogi
aḳhiri baat darmiyan hi thi
aur phir kaal kaT ga.i hogi
ya ziyada qarib tha vo shaḳhs
ya zamin hi simaT ga.i hogi
hijr ki shab ko jab koi na mila
mujh se aa kar lipaT ga.i hogi
chal paḌi sub.h ki taraf jab main
raah se raat haT ga.i hogi
tum mira chehra dekhne aana
raushni jab palaT ga.i hogi
dukh agar the mire tavil bahut
to ḳhushi do minute ga.i hogi
jab koi qahqaha nahin hoga
‘sa.adiya’ dukh men baT ga.i hogi
Leave a Reply