Zamane Ho Gae Tere Karam Ki Aas Lagi

zamane ho gae tere karam ki aas lagi

qarib-e-mai-kada sahra si mujh ko pyaas lagi

lahu rulate hain mujh ko suhavne manzar

chaTakti chandni tere bina udaas lagi

na us men mai hai na paani to pyaas kaise bujhe

ye zindagi mujhe TuuTa hua gilas lagi

ye garm garm se aansu bata rahe hain yahi

zarur aag kahin dil ke as-pas lagi

yahan to koi bhi malik nahin mire sahab

tamam ḳhalq mujhe ḳhvahishon ki daas lagi

jahez naam hi se rang uḌ gaya us ka

gharib baap ki beTi jahan-shanas lagi

kaḌakti dhuup men chal to paḌi dulhan ‘hasrat’

qadam qadam pe use raste men pyaas lagi

Leave a Comment