harf-e-tadbir na tha harf-e-dilasa raushan
main jo Duuba to hua sahil-e-dariya raushan
ahd men apne musallat hai andheron ka azaab
taaq men vaqt ke rakh do koi lamha raushan
yusuf-asa sar-e-bazar hain rusva lekin
vadi-e-ishq men hai azm-e-zuleḳha raushan
jo miri maan ne diya raḳht-e-safar ki surat
mere mathe pe abhi tak hai vo bosa raushan
tiir andheron ke mujhe zad men liye baiThe hain
jaise is bazm men huun main hi akela raushan
ain mumkin hai pighal jaa.en andhere dil ke
ai ‘zafar’ aise men ho gar koi naghma raushan
Leave a Reply