pahlu ko tire ishq men viran nahin dekha
is dil ko kabhi khali-az-arman nahin dekha
surat ko miri dekh ke hairat hai tumhen kya
tum ne to mira hal-e-pareshan nahin dekha
muusa hue behosh tajalli-e-laqa se
talib the magar jalva-e-janan nahin dekha
rote hain gunahon pe vahi jin men hai iman
kafir ko kabhi ham ne pasheman nahin dekha
dekha jo mira dagh-e-jigar hans ke vo bole
aisa to charagh-e-tah-e-daman nahin dekha
ai dard-e-jigar chain zara lene de mujh ko
tujh sa bhi koi jaan ka khvahan nahin dekha
sar kat ke gira shauq se qatil ke qadam par
aisa bhi koi banda-e-ehsan nahin dekha
rone pe miri tum ko tahayyur ye abas hai
kya tum ne kabhi abr ko giryan nahin dekha
dekhi hai bahut aap ne aine ki hairat
ashiq ka magar dida-e-hairan nahin dekha
sar-gashta vo sahra-e-musibat men na hoga
jis ne tiri zulfon ko pareshan nahin dekha
puchha jo ‘jamila’ se to vo mujh se ye bole
dil sa to koi dusra aivan nahin dekha
Leave a Reply